വാൻകൂവർ: വേതനത്തെ ചൊല്ലിയുള്ള തർക്കം രൂക്ഷമായതോടെ ബ്രിട്ടീഷ് കൊളംബിയ ജനറൽ എംപ്ലോയീസ് യൂണിയൻ (BCGEU) സമരം വീണ്ടും ശക്തമാക്കി. 22 സ്ഥാപനങ്ങളിൽ നിന്നുള്ള 900-ഓളം അധിക ജീവനക്കാർ കൂടി സമരത്തിൽ പങ്കുചേർന്നതോടെ, നിലവിൽ പ്രവിശ്യയിലുടനീളം 17,000-ത്തിലധികം സർക്കാർ ജീവനക്കാരാണ് പണിമുടക്കിൽ ഏർപ്പെട്ടിരിക്കുന്നത്. അഞ്ചാം വാരത്തിലേക്ക് കടക്കുന്ന ഈ സമരം BC ലിക്വർ സ്റ്റോറുകൾ, BC കഞ്ചാവ് സ്റ്റോറുകൾ, വിവിധ മന്ത്രാലയങ്ങളിലെ ജീവനക്കാർ എന്നിവരെ ബാധിച്ചു.
പ്രവിശ്യയിലെ പകുതിയോളം ലിക്വർ, കഞ്ചാവ് സ്റ്റോറുകൾ അടച്ചുപൂട്ടുമെന്ന് യൂണിയൻ പ്രസിഡൻ്റ് പോൾ ഫിഞ്ച് മുന്നറിയിപ്പ് നൽകി. വിലക്കയറ്റത്തിനനുസരിച്ചുള്ള ശമ്പള വർദ്ധനവ് അംഗീകരിക്കുന്ന ഒരു ഓഫറുമായി സർക്കാർ ചർച്ചയ്ക്ക് തയ്യാറാകണമെന്നും അല്ലെങ്കിൽ സമരം കൂടുതൽ ശക്തമാക്കുമെന്നും യൂണിയൻ അറിയിച്ചു. രണ്ട് വർഷത്തേക്ക് പ്രതിവർഷം നാല് ശതമാനം വർധനയാണ് യൂണിയൻ ആവശ്യപ്പെടുന്നത്, എന്നാൽ രണ്ട് വർഷത്തേക്ക് ടാർഗെറ്റഡ് അഡ്ജസ്റ്റ്മെന്റുകൾ ഉൾപ്പെടെ മൊത്തം അഞ്ച് ശതമാനം വർധനയാണ് സർക്കാർ വാഗ്ദാനം ചെയ്യുന്നത്. കഴിഞ്ഞ ആഴ്ചയിലെ ചർച്ച കാര്യമായ പുരോഗതി ഇല്ലാത്തതിനാൽ പരാജയപ്പെട്ടിരുന്നു.
ബ്രിട്ടീഷ് കൊളംബിയയിലെ ഏറ്റവും പുതിയ വാർത്തകൾക്കായി: https://chat.whatsapp.com/BdXwYUmHjmE31GOwCPbt2F
