ഫെഡറൽ സർക്കാരിൽ വിജയകരമായി സമ്മർദ്ദം ചെലുത്തിയതിനെത്തുടർന്ന് IRCC ബ്രിട്ടീഷ് കൊളംബിയയുടെ കുടിയേറ്റ ക്വോട്ട വർധിപ്പിച്ചു. ഇതോടെ 2025-ലെ കുടിയേറ്റ നോമിനേഷൻ വിഹിതത്തിൽ BC പ്രൊവിൻഷ്യൽ നോമിനി പ്രോഗ്രാമിന് (BC PNP) അധികമായി 1,254 ഇടങ്ങൾ കൂടി ലഭിച്ചു. ആരോഗ്യപ്രവർത്തകർ, സംരംഭകർ, ഉയർന്ന സാമ്പത്തിക സ്വാധീനമുള്ളവർ തുടങ്ങിയ BC PNP-യുടെ നിലവിലുള്ള മുൻഗണനാ വിഭാഗങ്ങൾക്ക് ഈ നോമിനേഷനുകൾ വലിയ സഹായമാകും. പ്രത്യേകിച്ച്, 2024-ൽ അപേക്ഷ നൽകി കാത്തിരിക്കുന്ന 2,240 ഇന്റർനാഷണൽ പോസ്റ്റ്-ഗ്രാജ്വേറ്റ് (IPG) അപേക്ഷകരിൽ ഒരു വിഭാഗത്തെ പരിഗണിക്കാൻ ഈ അധിക നോമിനേഷനുകൾ BC PNP-യെ സഹായിക്കും. ഇനി വെയിറ്റിംഗ് ലിസ്റ്റിലുള്ള വിദ്യാർത്ഥികൾക്ക് പ്രതീക്ഷയോടെ കാത്തിരിക്കാം.
BC-യിലേക്ക് കുടിയേറാൻ ആഗ്രഹിക്കുന്നവരുടെ സൗകര്യം മെച്ചപ്പെടുത്താൻ BC PNP പുതിയ മാറ്റങ്ങൾ നടപ്പാക്കി. ഉപയോക്താക്കളുടെ അഭിപ്രായങ്ങൾ മാനിച്ച് WelcomeBC.ca വെബ്സൈറ്റ് കൂടുതൽ മനോഹരവും ഉപയോഗിക്കാൻ എളുപ്പവുമാക്കി പുനർനിർമ്മിച്ചു. ഓരോ ഉപയോക്താവിന്റെയും ആവശ്യങ്ങൾക്കനുസരിച്ച് വിവരങ്ങൾ വേഗത്തിൽ കണ്ടെത്താൻ സഹായിക്കുന്ന രീതിയിലാണ് പുതുക്കൽ. ഇതിനൊപ്പം, പുതിയതായി എത്തുന്നവർക്കുള്ള ‘BC Newcomers’ Guide 2025′ പതിപ്പും പുറത്തിറക്കി. BC-യിൽ എത്തുന്നതിന് മുമ്പും ശേഷവും വേണ്ട വിവരങ്ങൾ, QR കോഡുകൾ വഴി വെബ്സൈറ്റുകളിലേക്ക് വേഗത്തിൽ എത്താനുള്ള സൗകര്യം എന്നിവ ഉൾപ്പെടുത്തിയ ഈ ഗൈഡ് സൗജന്യമായി ലഭ്യമാണ്. BC-യിലെ പുതിയ ജീവിതം ആത്മവിശ്വാസത്തോടെ ആരംഭിക്കാൻ ഇത് തീർച്ചയായും ഉപകരിക്കും.
യഥാർത്ഥത്തിൽ, 2025-ലെ തുടക്കത്തിൽ BC PNP ഒരു പ്രതിസന്ധി നേരിട്ടിരുന്നു. ഫെഡറൽ സർക്കാർ BC-ക്കുള്ള നോമിനേഷനുകളുടെ എണ്ണം 2024-നെ അപേക്ഷിച്ച് 50% കുറച്ച് 4,000 ആയി നിശ്ചയിച്ചിരുന്നു. ഈ കുറവ് BC PNP-യുടെ പ്രവർത്തനങ്ങളെ ബാധിക്കുമെന്നും കാത്തിരിപ്പ് സമയം വർധിക്കുമെന്നും പ്രവിശ്യ അറിയിച്ചിരുന്നു. എന്നാൽ, ആരോഗ്യം, സംരംഭകത്വം, ഉയർന്ന സാമ്പത്തിക സ്വാധീനം എന്നിവയ്ക്ക് മുൻഗണന നൽകി BC PNP തങ്ങളുടെ മുൻഗണനകൾ പ്രഖ്യാപിച്ചു. കൂടുതൽ നോമിനേഷനുകൾക്കായി ഫെഡറൽ സർക്കാരുമായി ചർച്ചകൾ തുടരുകയാണെന്നും അറിയിച്ചിരുന്നു. ഇപ്പോഴുള്ള 1,254 അധിക നോമിനേഷനുകൾ ഒരു ആശ്വാസമാണെങ്കിലും, കൂടുതൽ പേർക്ക് അവസരം ലഭിക്കാൻ BC ഇനിയും ശ്രമം തുടരുന്നു.
പുതിയ മാറ്റങ്ങൾ അറിയാൻ ‘Skills Immigration Program Guide’ പതിവായി പരിശോധിക്കണമെന്ന് BC PNP നിർദ്ദേശിക്കുന്നു. കാനഡയുടെ അടുത്ത കുടിയേറ്റ നയരേഖ (Immigration Levels Plan) സംബന്ധിച്ച് പൊതുജനാഭിപ്രായങ്ങൾ തേടുന്ന കൺസൾട്ടേഷൻ ഇപ്പോഴും നടക്കുന്നു. കൂടാതെ, BC PNP തട്ടിപ്പുകൾക്കെതിരെ ജാഗ്രത പാലിക്കാനും ആവശ്യപ്പെടുന്നു.
ബ്രിട്ടീഷ് കൊളംബിയയിലെ ഏറ്റവും പുതിയ വാർത്തകൾക്കായി: https://chat.whatsapp.com/BdXwYUmHjmE31GOwCPbt2F
