കാനഡയിലെ ലാംഗ്ലിയിൽ (Langley) റെസിഡൻഷ്യൽ കോണ്ടോ കെട്ടിടത്തിൽ അതിക്രമിച്ചു കടന്ന രണ്ട് അജ്ഞാതർ മലയാളി താമസക്കാരന്റെ വാഹനം മോഷ്ടിക്കുകയും ആമസോൺ പാഴ്സലുകൾ അടക്കമുള്ള വസ്തുക്കൾ കവരുകയും ചെയ്തത് പ്രദേശത്തെ ഇന്ത്യൻ സമൂഹത്തിൽ വലിയ ആശങ്കയുണർത്തിയിരിക്കുകയാണ്. നവംബർ 5-ന് പുലർച്ചെ 3:15 AM ഓടെയാണ് സംഭവം നടന്നത്. മോഷ്ടിക്കപ്പെട്ട വാഹനം (KIA Seltos) മലയാളി താമസക്കാരന്റേതായിരുന്നു എന്നാണ് വിവരം.
സുരക്ഷാ ദൃശ്യങ്ങൾ സഹിതം അസെന്റ് റിയൽ എസ്റ്റേറ്റ് മാനേജ്മെന്റ് കോർപ്പറേഷൻ (Ascent Real Estate Management Corporation) നവംബർ 6-ന് താമസക്കാർക്ക് സുരക്ഷാ മുന്നറിയിപ്പ് നൽകിയതോടെയാണ് മോഷണവിവരം പുറത്തുവന്നത്. സുരക്ഷാ ദൃശ്യങ്ങൾ പ്രകാരം, താക്കോലോ ഫോബോ ഉപയോഗിക്കാതെ പാർക്കേഡ് പ്രവേശന കവാടത്തിനടുത്ത് കാത്തുനിന്ന്, മറ്റൊരാൾ കടന്നപ്പോൾ അകത്തുകടന്ന മോഷ്ടാക്കൾ കോണ്ടോയുടെ പ്രധാന ഗേറ്റ് തകർക്കുകയും തുടർന്ന് പാർക്കേഡ് ഗേറ്റിന്റെ മെക്കാനിസം നശിപ്പിച്ച് വാഹനം മോഷ്ടിച്ച് കടന്നുകളയുകയുമായിരുന്നു. വാഹനത്തോടൊപ്പം കെട്ടിടത്തിന്റെ പൊതുസ്ഥലത്തുണ്ടായിരുന്ന ആമസോൺ പാഴ്സലുകളും മറ്റ് വസ്തുക്കളും ഇവർ കവർന്നതായി റിപ്പോർട്ടുണ്ട്.
സംഭവത്തിൽ RCMP അന്വേഷണം ആരംഭിച്ചിട്ടുണ്ട്. ഇതിന്റെ പശ്ചാത്തലത്തിൽ, കെട്ടിടത്തിന്റെ സുരക്ഷ ശക്തിപ്പെടുത്താൻ മാനേജ്മെന്റ് അടിയന്തര നടപടികൾ ആരംഭിച്ചു; തകർന്ന പാർക്കേഡ് ഗേറ്റ് മെക്കാനിസം നന്നാക്കാനും പ്രധാന കവാടത്തിൽ പുതിയ സെക്യൂരിറ്റി ഡോർ സിസ്റ്റം സ്ഥാപിക്കാനും പദ്ധതിയിട്ടിട്ടുണ്ട്. താമസക്കാർ ജാഗ്രത പാലിക്കണമെന്നും, വാഹനത്തിനുള്ളിൽ വിലപിടിപ്പുള്ള വസ്തുക്കൾ വെക്കരുതെന്നും, അപരിചിതരെ പാർക്കേഡിലേക്ക് പിന്തുടരാൻ അനുവദിക്കരുതെന്നും മാനേജ്മെന്റ് നിർദ്ദേശിച്ചു. സംശയാസ്പദമായ സാഹചര്യങ്ങൾ ശ്രദ്ധയിൽപ്പെട്ടാൽ RCMP-യുടെ നോൺ-എമർജൻസി നമ്പറായ 604-532-3200-ൽ വിളിക്കണമെന്നും, അടിയന്തര സാഹചര്യങ്ങളിൽ 911-ൽ ബന്ധപ്പെടണമെന്നും മാനേജ്മെന്റ് നിർദ്ദേശിച്ചു.
ബ്രിട്ടീഷ് കൊളംബിയയിലെ ഏറ്റവും പുതിയ വാർത്തകൾക്കായി JOIN: https://chat.whatsapp.com/BdXwYUmHjmE31GOwCPbt2F
