റോഡപകടങ്ങൾ കുറയ്ക്കുന്നതിനുള്ള സുപ്രധാന നീക്കമെന്ന നിലയിൽ, നഗരത്തിലെ ഭൂരിപക്ഷം പാതകളിലെയും വേഗപരിധി കുറയ്ക്കാൻ സറേ കൗൺസിൽ വോട്ട് രേഖപ്പെടുത്തി. തിങ്കളാഴ്ച രാത്രി (നവംബർ 17) ചേർന്ന കൗൺസിൽ യോഗത്തിലാണ് “വിഷൻ സീറോ സറേ സേഫ് മൊബിലിറ്റി പ്ലാൻ” (Vision Zero Surrey Safe Mobility Plan) പ്രകാരമുള്ള മാറ്റങ്ങൾക്ക് അംഗീകാരം ലഭിച്ചത്.
നഗരപാതകളിലെ മരണം, ഗുരുതരമായ പരിക്കുകൾ എന്നിവ ഇല്ലാതാക്കുക എന്ന ലക്ഷ്യത്തോടെയാണ് ഈ തീരുമാനം. എഞ്ചിനീയറിംഗ് ജനറൽ മാനേജർ സ്കോട്ട് ന്യൂമാൻ സമർപ്പിച്ച കോർപ്പറേറ്റ് റിപ്പോർട്ടിലെ ശുപാർശകളാണ് കൗൺസിൽ അംഗീകരിച്ചത്.
അംഗീകരിച്ച പ്രധാന മാറ്റങ്ങൾ:
- പ്രധാന പാതകൾ (Arterial Roads): നിലവിൽ 70 കി.മീ/മണിക്കൂർ വേഗപരിധിയുള്ള പ്രധാന പാതകളിൽ വേഗം 60 കി.മീ/മണിക്കൂറായി കുറയ്ക്കും. കാർഷിക മേഖലകളിലൂടെ കടന്നുപോകുന്ന കുറഞ്ഞ അപകടസാധ്യതയുള്ള റീജിയണൽ കണക്ടറുകളെ ഇതിൽനിന്ന് ഒഴിവാക്കും.
- കളക്ടർ റോഡുകൾ (Collector Roads): 60 കി.മീ/മണിക്കൂർ വേഗമുള്ള കളക്ടർ റോഡുകളുടെ പരിധി 50 കി.മീ/മണിക്കൂറായി നിജപ്പെടുത്തി.
- അർബൻ സെന്ററുകളിലെ റോഡുകൾ: നഗരകേന്ദ്രങ്ങളിലെയും ഉയർന്ന അപകടസാധ്യതയുള്ള മേഖലകളിലെയും 60 കി.മീ/മണിക്കൂർ വേഗപരിധിയുള്ള റോഡുകളിൽ കാൽനടയാത്ര, ഭൂവിനിയോഗം, അപകടങ്ങളുടെ ചരിത്രം എന്നിവ വിലയിരുത്തി വേഗം 50 കി.മീ/മണിക്കൂറായി കുറയ്ക്കുന്നതിനുള്ള സാധ്യതകൾ പരിശോധിക്കും.
- പ്രാദേശിക റോഡുകൾ (Local Roads): പ്രാദേശിക റോഡുകളിലെ വേഗം 50 കി.മീ/മണിക്കൂറിൽ തുടരും.
- സ്കൂൾ/പാർക്ക് സുരക്ഷ: സ്കൂളുകൾക്കും പാർക്കുകൾക്കും മുന്നിലുള്ള എല്ലാ പ്രാദേശിക റോഡുകളിലും സ്പീഡ് ബമ്പറുകൾ സ്ഥാപിക്കും. സർക്കാർ/സ്വകാര്യ സ്കൂളുകൾക്ക് ഈ മാറ്റം ബാധകമാണ്.
- കൂടുതൽ വേഗപരിധി കുറയ്ക്കാൻ ആവശ്യം: റോഡുകളിലെ സ്ഥിര വേഗപരിധി 40 കി.മീ/മണിക്കൂറായി കുറയ്ക്കുന്നതിനായി പ്രൊവിൻഷ്യൽ നിയമത്തിൽ ഭേദഗതി വരുത്തണമെന്ന് ആവശ്യപ്പെട്ട് സംസ്ഥാന സർക്കാരിന് കത്ത് നൽകാനുള്ള നീക്കവും കൗൺസിൽ തുടരും.
അപകടങ്ങളുടെ വിവരങ്ങൾ
കാൽനടയാത്രക്കാരുമായി ബന്ധപ്പെട്ട 70 ശതമാനം അപകടങ്ങളും ആർട്ടീരിയൽ റോഡുകളിലാണ് നടക്കുന്നതെന്ന 2023-ലെ പഠന റിപ്പോർട്ടിന്റെ പശ്ചാത്തലത്തിലാണ് ഈ നടപടി. സിഗ്നൽ ലൈറ്റുകളുള്ള കവലകളിലാണ് മിക്ക കൂട്ടിയിടികളും സംഭവിക്കുന്നത്.
വേഗപരിധിയിലെ പുതിയ മാറ്റങ്ങൾ, വിഷൻ സീറോ പദ്ധതിയുടെ അടുത്ത ഘട്ടമാണ്. സറേയിലെ തെരുവുകൾ കൂടുതൽ സുരക്ഷിതവും വാസയോഗ്യവുമാക്കാൻ ഈ ശ്രമങ്ങൾ സഹായിക്കുമെന്ന് എഞ്ചിനീയറിംഗ് ജനറൽ മാനേജർ സ്കോട്ട് ന്യൂമാൻ അഭിപ്രായപ്പെട്ടു.
